Besti árangur í hópfimleikum hingað til
Árangur á Evrópumótinu í hópfimleikum er besti árangur sem Ísland hefur náð hingað til í hópfimleikum þar sem keppt er í dýnustökki, trampolíni og dansi með fimleikaæfingum. Fyrir mótið var markmið að komast í 6 liða úrslit þrátt fyrir að vissulega hafi verðlaunasæti ávallt verið haft í huga eftir góðan árangur Stjörnunnar á síðasta móti þar sem stúlkurnar urðu í 4. sæti. Niðurstaðan að verða í 2. sæti er stórsigur. Sýnir þessi árangur m.a. að fimleikar á Íslandi er stundaðir af mikilli fagmennsku þar sem öllu því besta er til tjaldað. Þjálfarar hópsins eru fagmenn á sínum sviðum og stúlkurnar taka íþróttinni alvarlega. Aðstaðan sem hópurinn æfir við að Versölum í Kópavogi er á heimsmælikvarða.

Hörð samkeppni
Sjá nánar hér

Fræðslunefnd vill minna á áður auglýst námskeið 2A sem fram fer helgina 11 – 12 nóvember næstkomandi. Enn eru örfá sæti laus á námskeiðinu og er áhugasömum bent á að hafa samband við skrifstofu FSÍ í netfangið fsi@isisport.is eða í síma 514 4060 fyrir föstudag.
Í bóklegum hluta er kennsluefni þrekþjálfun í fimleikum, teygjuæfingar, stökk á bretti og skrúfur. Í verklegum hluta verður farið í framhaldsæfingar á trampólíni, dýnu, stökki og á rá.
Kennarar á námskeiðinu verða: Christian Vilpola, Guðmundur Þór Brynjólfsson og Hlín Bjarnadóttir

Ólafur Rafnsson, Forseti Íþrótta- og Ólympíusambands Íslands (ÍSÍ), hefur sent Fimleikasambandi Íslands og Íþróttafélaginu Gerplu hamingjuóskir með árangur stúlknanna í hópfimleikum sem tryggðu sér annað sæti á Evrópumóti nú um helgina sem er sannarlega frábær árangur að mati Forseta Íþrótta- og Ólympíusambands Íslands.

Ólafur Rafnsson, Forseti Íþrótta- og Ólympíusambands Íslands (ÍSÍ) ásamt Kristjáni Erlendssyni formanni Fimleikasambands Íslands var boðið í opinbera heimsókn í Íþróttafélagið Gerplu í Kópavogi þann 26. október.
Var Ólafi Rafnssyni kynnt starfssemi Gerplu. Við sama tækifæri tók hann þátt í því að afhenda viðurkenningar til fulltrúa félagsins á Heimsmeistaramótinu í áhaldafimleikum í Århus í Danmörku og þátttakendum félagsins á Special Olympics sem fram fór í byrjun október. Ávarpaði Ólafur iðkendur og ræddi svo við nokkra þeirra í salnum.
Staða fimleika á Íslandi var svo rædd á fundi þar sem Ólafur Rafnsson sagðist verða var við sterka stöðu greinarinnar auk þess sem hann hrósaði m.a. sérstaklega FSÍ fyrir öflugt fræðslustarf sem hann kvað vera eitt það öflugasta sem þekktist innan íþróttahreyfingarinnar. Fjölmörg önnur mál voru rædd á góðum fundi sem stjórn félagsins og þjálfarar voru ánægðir með.

Að fundi loknum var Ólafi Rafnssyni svo boðið að fylgjast með æfingamóti þar sem keppendur félagsins á Evrópumótinu í hópfimleikum sýndu honum æfingar sínar. Sömu æfingar og hafa nú tryggt þeim silfurverðlaun á Evrópumótinu sem fram fór um helgina.

Stúlkurnar úr Íþróttafélaginu Gerplu í Kópavogi höfnuðu í 2. sæti í úrslitum á Evrópumótinu í hópfimleikum sem var að ljúka rétt í þessu. Um er að ræða glæsilegan árangur sem ekki á sér hliðstæðu í sögu fimleika á Íslandi.

Eins og Björn Björnsson einn af þjálfurum stúlknanna sagði eftir undanúrslitin að þá hafi hér fyrst og fremst verið um að ræða sigur liðsheildarinnar. Mikil gleði ríkir nú hjá stúlkunum.

Í fyrsta sæti varð Stockholm Top Gymnastics (SWE) með 26,15 stig. Gerpla í öðru sæti með 25,25 stig og Slagelse GF (DEN) með 25,1 stig.

Í samtali við Kim Fischer, rétt í þann mund sem verðlaunaafhending var að byrja, sagði hann að hann væri að rifna úr stolti yfir frammistöðu stúlknanna enda væri árangur þeirra hreint út sagt ótrúlegur. Sérstaklega þegar haft væri í huga að á íslandi stunda um 7.000 iðkendur fimleika en á þessu móti væru stúlkurnar að keppa á móti þjóðum þar sem iðkendafjöldi væri margfallt margfallt hærri en á Íslandi. Enginn hefði trúað þessu fyrir mótið en niðurstaðan liggur fyrir sagði Kim rétt í þessu þegar silfurverðlaunin eru sett um hálsin á stúlkunum. Verðlaun sem þær munu allar varðveita vel og lengi.

Stúlkurnar sem skipa hóp Gerplu eru þær: Auður Ólafsdóttir, Ásdís Dagmar Þorsteinsdóttir, Ásdís Guðmundsdóttir, Gury Andersson, Hrefna Þorbjörg Hákonardóttir, Inam Rakel Yasin, Íris Mist Magnúsdóttir, Íris Svavarsdóttir, Jóhanna Gunnarsdóttir, Kolbrún Sveinsdóttir, Magdalena Rós Guðnadóttir, Rut Valgeirsdóttir, Sara Rut Ágústsdóttir, Soffía Bergsdóttir, Sólveig Jónsdóttir, Svava Björg Örlygsdóttir og Þórunn Arnardóttir.

Þjálfarar Gerplu eru þau Ása Inga Þorsteinsdóttir, Björn Björnsson, Dorthe Camilla Jensen, Kim Per Hauberg Fischer og Michel Christensen en þau eru öll stödd í Ostrava í Tékklandi með hópnum.

Heimasíða Evrópumótsins er: http://www.teamgym06.cz
Úrslit hér: http://eng.teamgym06.cz/downloads/results/womens/

Við vinnslu á frétt um mótið þá eru eftirtaldir aðila staddir á mótinu með símann opinn:
Björn Björnsson (þjálfari): 856-7132
Anna Möller (framkvæmdastjóri FSÍ): 898-8168
Auður Inga Þorsteinsdóttir (dómari): 861-8990

Undanúrslit á Evrópumótinu í hópfimleikum fór fram í Ostrava í Tékklandi núna þar sem stúlknasveit Gerplu hafnaði í 2. sæti af 22 liðum og tryggði sér þar með rétt til þátttöku í úrslitum sem fram fer á morgun (laugardaginn 4. nóvember) þar sem keppt verður um Evrópumeistaratitil í hópfimleikum.
Sterkt lið Stockholm Top Gymnastics frá Svíþjóð varð efst með 25,6 stig en þessi hópur hefur borið höfuð og herðar yfir önnur lið í hópfimleikum kvenna á undanförnu. Gerpla var með 25,5 stig og annað lið frá LIMG Svíþjóð varð í þriðja sæti með 24,6. Stúlknasveit Gróttu varð í 8. sæti.
Segja má að lið Gerplu og Stockholm Top Gymnastics hafi verið í ákveðnum sérflokki á mótinu en að ssögn Björns Björnssonar, eins af þjálfurum hópsins frá Gerplu, hafi hér verið um að ræða ótvíræðan sigur liðsheildarinnar en mikil og góð stemming er í hópnum. Að baki sé langur undirbúningur. Hópurinn hefur sýnt stöðugar framfarir á undanförnu þar sem stúlkurnar hafa bætt sig jafnt og þétt. Að hans sögn er ætlunin að hápunktinum verði náð á morgun og eru allir í hópnum mjög spenntir og tilbúnir fyrir morgundaginn. Nú er bara að sjá hvort að hópnum takist að landa Evrópumeistaratitli í hópfimleikum.
Mikill heiður var fyrir Auði Ingu Þorsteinsdóttur að gegna stöðu yfirdómara í keppni karla á mótinu. Auður sagði að áhugavert væri að fylgjast með dómgæslu því sú óvanalega staða kom upp að enginn dómari frá Norðurlöndunum var dregin út til að dæma æfingar í dansi sem gæti haft einhver áhrif þar sem dansarnir eru mjög mismunandi á milli landa og það sérstaklega hinn norrænni blær sem ekki allir eru jafn hrifnir af.

Evrópumót í hópfimleikum er haldið í Ostrava í Tékklandi núna 2. - 5. nóvember.
Lið Gerplu og Gróttu munu taka þátt í mótinu. Þrír dómarar dæma á mótinu er það eru þær: Auður Inga Þorsteinsdóttir, Gyða Kristmannsdóttir og Sigríður Ósk Harðardóttir.
Keppnin hefst föstudaginn 3. nóvember með forkeppni en síðan keppt til úrslita á laugardag en 6 lið komast í úrslit í hverjum flokki. Keppt er í kvenna, karla og blönduðum liðum. Ljóst er að keppnin verður hörð og spennandi.