fimleikar.is

Íslenskar fimleikastúlkur standa sig vel á móti í Noregi

25/5/2006

Helgina 20. og 21.maí var haldið svokallað Rola turnfest í bænum Asker skammt suður af Oslo í Noregi. Þetta er árvisst mót þar sem stúlkur upp að 14 ára aldri keppa í áhalda fimleikum. Í þetta sinn voru 167 keppendur frá 22 félögum í Noregi. Meðal keppenda voru tvær íslenskar stúlkur, þær Aníta Ósk Einarsdóttir og Jóhanna Rakel Jónasdóttir. Aníta Ósk býr í Asker en Jóhanna Rakel býr í Moskvu. Jóhanna keppti fyrir félag vinkonu sinnar Asker en í Noregi er leyfilegt fyrir utanaðkomandi upp að 12 ára aldri að keppa fyrir Norskt félag.
Mótið var aðallega liðakeppni en einnig voru veitt verðlaun fyrir hæstu einstaka einkunn á mótinu. Skemmst er frá því að segja að báðar íslensku stúlkurnar voru í Asker liðum sem hrepptu 1.sætið í sínum aldursflokki. Anita Ósk í aldursflokki 1993-1994 og Jóhanna Rakel í aldursflokki 1995-1996. Auk þess fékk Jóhanna Rakel verðlaun fyrir hæstu einkunn á gólfi 14.50. Ekki voru veitt verðlaun fyrir keppni á einstökum áhöldum né í fjölþrautarkeppni en engu að síður er athyglisvert að Jóhanna Rakel hlaut flest stig í fjölþraut 54.50 og Anita Ósk 3. flest stigin eða 53.60. Er hér um að ræða mjög góðan árangur Íslenskra stúlkna og verður spennandi að fylgjast með þessum stúlkum í framtíðinni.
Einkunnir í liðakeppni hér. Niðurstöður einstaklinga hér og hér.

Jóhanna Rakel Jónasdóttir hlaut flest stig allra keppenda í fimleikamóti í Noregi þar sem 22 félög tóku þátt.

Aðalfundur Íþróttafélagsins Gerplu

25/5/2006

Íþróttafélagið Gerpla hélt aðalfund félagsins 17. maí sl. Gert var grein fyrir helstu þáttum í starfssemi félagsins á liðnu ári ásamt hefbundnum aðalfundarstörfum. Kosin var ný stjórn en hana skipa Jón Finnbogason, Jónas Jónmundsson, Guðmundur Halldórsson, Jochum M. Ulriksson, Karen Bjarnhéðinsdóttir og Ólafur Kristjánsson en Jón Finnbogason var kjörinn formaður félagsins. Kosin var ný stjórn fimleikadeildar en hana skipa Ásta Ísberg, Arna Þorsteinsdóttir, Ása Inga Þorsteinsdóttir og Dýri Kristjánsson en Ásta Ísberg var kjörinn formaður deildarinnar. Kristján Erlendsson lét af störfum sem formaður félagsins en hann hefur gengt því embætti undanfarin 11 ár en þar áður hafði hann setið í stjórn félagsins í 3 ár. Var Kristjáni þakkað fyrir góð störf í þágu félagsins ásamt því að Elísabetu Baldvins, eiginkonu Kristjáns, var einnig þakkað góð störf í þágu félagsins á undanförnum árum en hún hefur leikið lykilhlutverki við skipulagningu ýmiskonar verkefna á vegum félagsins s.s. fjáraflanna o.fl.
Á fundinum var stofnaður Framtíðarsjóður Íþróttafélagsins Gerplu en stofnframlag hans var söluandvirði húsnæðis félagsins að Skemmuvegi 6 í Kópavogi.
Árskýrslu stjórnar og fundargerð aðalfundar er að finna á heimasíðu félagsins www.gerpla.is
Vorsýning félagsins fer fram í Versölum n.k. laugardag kl. 11:00 og 14:30.

EM Grikklandi 2006

14/5/2006

Úrslit á Evrópumótinu í Grikklandi sjá hér.

Góður árangur á Evrópumeistaramótinu
- Jón Finnbogason heldur áfram skrifum beint frá Grikklandi

6/5/2006

Íslensku keppendurnir á Evrópumótinu í áhaldafimleikum hafa nú lokið keppni. Fimleikasamband Íslands sendi 11 keppendur á mótið og er óhætt að segja að þau hafi öll staðið sig mjög vel. Í karlaflokki kepptu fjórir keppendur og var árangur þeirra góður. Rúnar Alexandersson og Róbert Kristmannsson kepptu í eldri flokk. Róbert keppti á öllum áhöldum og hafnaði í 30. sæti í fjölþraut með 76,6, stig sem er hans besti árangur til þess á stórmóti.

Óhætt er að segja að Róbert hafi staðið fyrir sínu og framkvæmdi allar sínar æfingar án þess að detta. Róbert átti þó slæman dag á bogahesti og var nokkuð frá sínu besta .... meira hér!

Evrópumeistaramótið í fimleikum í Volos á Grikklandi
- Jón Finnbogason skrifar frá keppnisstað

4/5/2006

Íslenska kvennalandsliðið í fimleikum hefur nú lokið keppni á Evrópumótinu í áhaldafimleikum og er óhætt að segja að árangur þeirra hafi verið góður. Sif Pálsdóttir hafnaði í 18. sæti í fjölþraut og fylgdi þar eftir glæsilegum árangri sínum á Norðurlandamóti þar sem hún sigraði í fjölþraut. Framganga keppenda í stúlknaflokki vakti einnig töluverða athygli hér á Grikklandi og var haft á orði að greinilega væri mikil þróun í fimleikum á Íslandi.

Fram kom í fjölmiðlum, sem fjalla mikið um Evrópumótið, að raun sé sigur fólginn í því að jafn lítil þjóð og Ísland skuli mæta til leiks með tvö stúlknalið (yngi og eldri). Finnum við fyrir því hér að vaskleg framganga stúlknanna varpar kastljósinu á keppendur okkar í karlaflokki. Meira hér!

Ítalir stálu senunni - Rússar með yfirburði í unglingaflokki
- Liðakeppnin á Evrópumeistaramóti kvenna í Grikklandi

2/5/2006

Ítalir eru nýjasta stórþjóðin í fimleikum kvenna. Þær urðu um helgina Evrópumeistarar í liðakeppni á EM sem haldið var í Volos í Grikklandi. Svo óvænt urðu úrslitin tafir urðu á verðlaunaafhendingu þar sem mótshaldarar voru ekki með þjóðsöng Ítalíu við hendina. Vanessa Ferrari (stóð svo sannarlega undir nafni) tryggði Ítalíu sigurinn með glæsilegum gólfæfingum í lok keppninnar. Ferrari þessi varð jafnframt með hæstu fjölþrautareinkun einstaklinga í keppninni.

Evrópumeistarar Ítala fagna

Í öðru sæti, aðeins 0,100 stigum á eftir Ítölum, urðu Rúmenar. Rússar, sem voru efstir eftir forkeppnina, fengu síðan silfrið.

Í unglingakeppninni urðu Rússar Evrópumeistarar. Þetta var fjórði EM titill Rússa í röð. Í öðru sæti urðu Rúmenar og Þjóðverjar í því þriðja.

Sjá fréttir af gengi íslensku stúlknanna hér að neðan. Fleiri fréttir af EM hér.