Keppendur eru í fremri röð frá vinstri: Hera Jóhannesdóttir, Sif Pálsdóttir, Margrét Hulda Karlsdóttir, Inga Rós Gunnarsdóttir, Gunnar Sigurðsson, Viktor Kristmannsson, Jónas Valgeirsson og Róbert Kristmannsson. Aftari röð: Ásdís B. Pétursdóttir, Axel Bragason og Guðmundur Þór Brynjólfsson.

Fimleikar njót nú mikilla vinsælda í Vestamannaeyjum og hafa keppendur aldrei verið fleiri hjá deildinni.

Meðfylgjandi myndband sýnir fimleikamann gera ótrúlegar æfingar á stöndinni innan um mikinn fjölda áhorfenda. Ekki er ráðlegt að reyna þessar æfingar eftir nema við fullkomnar aðstæður í fimleikahúsi. Að gera tvöfallt heljarstökk með heilli skrúfu á út á grasi þykir frekar ótrúlegt.

Dagana 24. 25. og 26. maí verða haldnar vorsýningar fimleikadeildarinnar. Tvær sýningar verða haldnar hvern dag, kl: 17:30 og 19:30. Það verður mikið rokkað og rólað og heyrast lög frá kóningunum sjálfum Elvis, til Eíríks Haukssonar og allt til Rage against the Machine! Miðaverð er 500 kr. fyrir 13 ára og eldri. Sýningarnar eru í Íþróttamiðstöðinni Björk. Hver sýning er um klukkutími. Góða skemmtun.

Mánudagskvöldið 23. maí n.k. frá kl 17:30 til 22:00 heldur Micahel T. Gross, PT, PhD Professor við "Program in Human Movement Science, Division of Physical Therapy" við Háskólann í Norður Karólínu fræðsluerindi á vegum ÍSÍ.
Michael verður staddur hérlendis vegna námskeiðs á vegum fræðslunefndar Félags íslenskra sjúkraþjálfara og þessi fyrirlestur er hugsaður fyrir þjálfara og sem og aðra áhugasama.
Heiti fyrirlestrarsins er "Common ankle injuries- recognition, treatment, and prevention" og fjallar hann um hvernig ökklameiðsli eiga sér stað, hvaða áhættuþætti ber að varast, hvernig hægt sé að draga úr áhættum og hvernig ber að þjálfa upp meiðsli.
Það er mikill fengur að fá jafn virtan kennara til landsins og þetta erindi á erindi til fljölmarga íþróttagreina.
Fyrirlesturinn fer fram í íþróttamiðstöðinni í Laugardagl, fundarsal E. Aðgangseyrir kr. 2.500,- sem greiðist á staðnum. Boðið verður upp á súpu og brauð í matarhléi.
Skráningar sendist á netfangið: namskeid@isisport.is í síðasta lagi sunnudaginn 22. maí n.k.

Kristjana Sæunn Ólafsdóttir

Heimasíða mótsins hér.

Kristjana Sæunn Ólafsdóttir úr Gerplu í Kópavogi og Íslandsmeistari í fimleikum kvenna til tveggja ára varð í 3. sæti í gólfæfingum og í 8. sæti í fjölþrautarúrslitum á mjög sterku fimleikamóti sem fer fram á hverju ári í Rússlandi, 2005 Dityatin Cup. Í fjölþrautarúrslitum, sem fram fór í gær, hlaut hún 32,425 stig sem er með því hæsta sem hún hefur fengið hingað til og átti þar einkunn hennar í gólfæfingum stóran þátt því hún hlaut 8,745 stig í fjölþraut sem skiluðu henni númer tvö inn í úrslit á gólfi. Í úrslitum á gólfi, sem fór fram í dag, hafnaði hún svo í 3. sæti með 8,213 stig næst á eftir tveimur stúlkum frá Rússlandi en stúlkurnar frá Rússlandi sigruðu á öllum áhöldum sem og í fjölþraut.
Vladimir Antonov þjálfari Sæunnar var mjög ánægður með árangur hennar enda um að ræða eitt sterkasta mót sem hún hefur keppt á hingað til.

Þátttakendur voru nú um 60 frá fjölda þjóða. Á mótinu keppa meðal annars allar bestu stúlkur Rússlands þar sem þær eru að keppast um þátttökurétt á Ólympíuleikum æskunnar. Eins og sjá má á einkunnum keppenda og myndum af mótinu á heimasíðu þess þá er hér augljóslega um mjög sterkt mót að ræða (heimasíða hér). Þess má geta að í fjölþrautarkeppni hafnaði stúlka frá finnlandi í 22. sæti en hún keppti á Ólympíuleikunum í fyrra.
Er þetta annað árið í röð sem Kristjana Sæunn keppir á Dityatin Cup (sjá umfjöllun í fyrra hér). Á heimasíðu mótsins má sjá stórglæsilegar myndir sem ljósmyndarinn Edwin Kopper hefur tekið en hann fylgir landsliði Rússlands á öll mót.

Í Morgunblaðinu er fjallað um gullnámu íþróttafélaganna. Hafa allar íþróttagreinar sömu möguleika til að nýta þessa gullnámu?

Morgunblaðið fjallaði um það fyrir nokkru að keppnin á Íslandsmótinu í handknattleik ráðist af möguleikum RÚV til að sýna frá leikjunum. Skiptar skoðanir eru um málið, en Júlíus Jónasson þjálfari ÍR-inga og afreksmaður í handknattleik er beinskeittur í viðtali við Morgunblaðið og ver ákvörðun HSÍ um að fara að óskum RÚV varðandi leiktíma og leikdaga. Hann telur að þannig verði umfjöllunin meiri og glæsilegri. Hann nefnir einnig að mikilvægt sé fyrir handknattleiksliðin að fá beinar sjónvarpsútsendingar því félögin eru þá betur í stakk búin að semja við samstarfsaðila sína, enda sé mikilvægt að geta bent á þá staðreynd að félagið hafi verið mikið í sjónvarpinu. Þannig hækki markaðsvirði félagsins.

Nánar

Fimleikafélagið Blanc-Mesnil í Frakklandi stendur fyrir alþjóðlegu fimleikamóti í áhaldafimleikum karla og kvenna í 15. skiptið en mótið fer fram dagana 4. og 5. nóvember 2005. Meðfylgjandi eru nánari upplýsingar um mótið.

Fylkir hélt sunnudaginn 1. maí Vinamót í þrepum íslenska fimleikastigans. Auk Fylkis taka þátt í þessu móti Fjölnir og Rán. Mótið heppnaðist mjög vel og voru um 130 stúlkur á aldrinum 7 til 13 ára mættar til leiks.

Mótið er einstaklingskeppni og dreifðust verðlaunin mjög vel milli félaganna. Þetta var í fyrsta sinn sem Fjölnir stendur fyrir svona vinmót en að sögn Þorbjargar Gísladóttur yfirþjálfar Fylkis þá er nú stefnt að því að gera þetta að árlegum viðburði.

FSÍ var að berast boð um þátttöku í æfingabúðum í hópfimleikum í Slagelse í Danmörku í ágúst n.k. 10. – 14. ágúst.
FSÍ stendur til boða að senda 2 þátttökulið. Hægt er að óska sérstaklega eftir undanþágu fyrir fleiri en ekki víst að það takist, fer örugglega eftir aðsókn. Tíminn er mjög naumur en tilkynna þarf áhuga, hvaða þjálfari muni stjórnar og fjölda í liði ásamt vali á gisitiaðstöðu fyrir 10.5.
Þátttökugjald er ef gist er í 2. manna herbergjum Dkr. 3.000 sem er u.þ.b. 33.700 eða í skólastofu Dkr. 28.000.- auk flugfars.
Þau félög sem hafa áhuga þurfa að senda upplýsingar í allra síðasta lagi mánudaginn 9. maí á netfangið fsi@isisport.is

Fimleikadeild Fylkis hélt byrjendamót föstudaginn 29.apríl síðastliðinn en á mótinu kepptu 8 lið frá 5 félögum. Í fyrsta sæti varð Keflavík með 24,6 stig, í öðru sæti varð Fjölnir T-1 með 23,2 stig og í því þriðja varð Grótta með 22,9 stig.

Eins og lesendur fimleikar.is hafa tekið eftir þá hafa mikið af ýmiskonar boðsmótum farið fram að untanförnu og hafa hópfimleikar verið áberandi. Er það eðlileg þróun af þeirri almennu fjölgun iðkenda í hópfimleikum sem virðist vera í öllum fimleikafélögum. Seint verður of oft sagt að hópfimleikar eru grein innan fimleika sem er á mikilli uppleið og býður í senn upp á krefjandi og skemmtilegt keppnisform ásamt því að æfingarfyrirkomulagið byggir upp liðsheild og góðan félagsanda hjá iðkendum. Nú á tímum mikils brottfalls úr íþróttum er ávallt gaman að sjá íþróttagreinar sem eru greinilega að snúa þeirri þróun við. Hópfimleikar koma þar sterkir til leiks.