Landslið Íslands í áhaldafimleikum unnu til gullverðlauna í liðakeppni kvenna og karla. Karlaliðið skipuðu: Bjarki Ásgeirsson, Dýri Kristjánsson, Ingvar Ágúst Jochumsson, Rúnar Alexandersson og Viktor Kristmannsson. Kvennaliðið skipuðu: Fríða Rún Einarsdóttir, Kristjana Sæunn Ólafsdóttir, Sigrún Dís Tryggvadóttir og Thelma Rut Hermannsdóttir. Margrét Hulda Karlsdóttir var einnig í liðinu en fór úr lið á fingri á síðasta æfingadegi og gat því miður ekki keppt með liðinu.
Fríða Rún og Viktor sigruðu í fjölþraut og Kristjana Sæunn varð í 3.sæti.
Í úrslitum á einstökum áhöldum fékk Viktor fern verðlaun; hann sigraði á gólfi, varð annar á bogahesti, tvíslá og hringjum og lenti í 3. sæti á svifrá. Rúnar sigraði tvíslá og varð annar í hringjum og Dýri hlaut silfurverðlaun á svifrá. Fríða Rún sigraði á gólfi og varð önnur á tvíslá og slá og Kristjana Sæunn hlaut tvenn bronsverðlaun; á tvíslá og gólfi.
Íslenskt fimleikafólk mun því snúa aftur til Íslands hlaðið verðlaunapeningum eftir frækin afrek í Mónakó. Áður hefur verið unnið til verðlauna á smáþjóðaleikum í fimleikum en óhætt er að segja að ekki hafi verið búist við að Íslendingarnir myndu tæma verðlaunaborðið ef svo má að orði komast. Fimleikafólkið okkar hefur sýnt og sannað eina ferðina enn að hér er að ferðinni stórglæsilegt afreksfólk sem er landi sínu til sóma.
Nánar um útslitin hér: http://www.monaco2007.mc/

Hlín Bjarnadóttir og Guðmundur Þór Brynjólfsson eignuðust þann 18. júní hraustan og pattaralegan dreng. Hann var 16,5 merkur og 51 cm. Þau Hlín og Gummi hafa verið mjög áberandi í starfi innan fimleikahreyfingarinnar á undanförnum áratugum og er því óhætt að segja að drengurinn mun verða var við umræður um fimleika á sínu heimili. Það er aldrei að vita nema drengurinn muni reyna fyrir sér í fimleikum í framtíðinni. Við viljum þó fyrir hönd fimleikafólks óska þeim Hlín og Gumma innilega til hamingju.

Meðal stærstu eigendahópa í kauphöllinni í Stokkhólmi eru sænskir frímúrarar. Þeir hafa stofnað fjölda fjárfestaingarsjóða og rennur allur hagnaður af fjárfestingunum til góðgerðarmála samkvæmt frétt sænska viðskiptablaðsins Dagens Industri. Heildarverðmæti þess fjár sem sjóðirnir hafa úr að spila er um 884 milljónir sænskra króna, jafngildi um 8,4 milljarða íslenskra króna. Þar af er um helmingur fjárfestinganna í sænskum hlutabréfum.
Stærstu eignirnar í safninu eru hlutir í nokkrum af öflgustu fyrirtækjum Svíþjóðar og ber þar helst að nefna H&M, Volvo og Nordea sem allt eru vel þekkt fyrirtæki. Vermæti eignasafnsins hefur hækkað um 20% það sem af er ári (þegar frétt var birt í mbl) og segist fulltrúi frímúrara í Svíþjóð ánægður með þróunina, svo lengi sem ávöxtunin standi undir skuldbindingum frímúrara sé ekki hægt að kvarta.
Það má segja að til þessa hafi verið litið þegar Fimleikasjóður Íslands var stofnaður árið 1999. Sjóðurinn hefur fjárfest í hlutabréfum einstakra félaga, hlutabréfa- og skuldabréfasjóðum. Hvað hlutabréf varðar, sem skráð eru í Kauphöll Íslands, þá hefur sjóðurinn í mörg ár verið hluthafi Kaupþingi banka hf. og hluthafi í Exista hf. frá skráningu á markað en þau eru ein stærstu félög landsins á sínu sviði. Frá áramótum hefur verðmæti hlutabréfa í Exista hf. hækkað um 49,78% og Kaupþings banka hf. um 33,5%. Þrátt fyrir að stærð Fimleikasjóðs Íslands megi sín lítils m.v. sambærilega sjóði í Svíþjóð þá hefur ávöxtun sjóðsins gengið mjög vel. Hugmyndafærðin er sú sama og hjá frímúrurum í Svíþjóð og því ekki ólíklegt að sjóðurinn verði enn öflugra afl í framtíðinni hvað varðar styrkveitingar til fimleikahreyfingarinnar.

Dagana 3. til 10. júní munu Smáþjóðaleikar fara fram í Mónakó. Tæplega 200 manns fara frá Íslandi, þarf af 20 manna hópur frá FSÍ. Keppendur í fimleikum eru: Margrét Hulda Karlsdóttir, Kristjana Sæunn Ólafsdóttir, Fríða Rún Einarsdóttir, Thelma Rut Hermannsdóttir, Sigrún Dís Tryggvadóttir, Bjarki Ásgeirsson, Dýri Kristjánsson, Ingvar Ágúst Jochumsson, Rúnar Alexandersson og Viktor Kristmannsson. Dómarar verða þau Berglind Pétursdóttir, Harpa Óskarsdóttir, Heimir Jón Gunnarsson og Björn M. Tómasson. Þjálfarar verða þau: Mykola Vovk, Svetlana Makaritseva og VladimirAntonov. Fararstjóri er Hrund Þorgeirsdóttir. Nánari upplýsingar má finna á heimasíðunni: http://www.monaco2007.mc/
Sjá einnig grein Stefáns Konráðssonar á www.isi.is