Evrópumót í áhaldafimleikum fór fram um mánaðamótin apríl / maí sl. Áttum við nokkra keppendur á mótinu og stóðu þeir sig vel eins og gert hefur verið grein fyrir. Auk keppendanna fóru dómarar, þjálfara og farastjórar einnig á mótið. Kom það í minn hlut að gegna hlutverki farastjóra hjá piltunum. Við það tækifæri voru meðfylgjandi myndir teknar. Evrópumótið var sannkölluð fimleikaveisla og mikil upplifun að fá tækifæri til þess að sjá okkar keppendur á stórmóti sem þessu og taka myndir af bestu fimleikamönnum Evrópu. Vil ég þakka fyrir mig og vona að þið njótið meðfylgjandi mynda.
Kveðja, Jón Finnbogason

Ingvar Jochumsson

Vorsýning Íþróttafélagsins Gerplu fór fram nú undir lok maí. Fram fóru tvær sýningar fyrir troðfullu húsi félagsins að Versölum í Kópavogi. Fram komu allir hópar félagsins og sýndu foreldrum og öðrum gestum brot af starfssemi félagsins.
Voru ýmsar viðurkenningar veittar á sýningunni. Kristján Erlendsson og Elísabet Baldvins voru heiðruð með Gullmerki Gerplu og gerð að heiðursfélögum Íþróttafélagsins Gerplu.

Rúnar Alexandersson undirritaði í vikunni samning við ÍSÍ í tilefni af styrk sem Alþjóða Ólympíuhreyfingin veitir 5 íslenskum íþróttamönnum til að auðvelda þeim að ná því takmarki að komast á Ólympíuleikana 2008 í Peking. Styrkupphæðin nemur $ 1.000.- á mánuði eða um 72.000.- ikr m.v. gengi í dag. Til viðbótar við styrkinn er hægt að sækja um viðbótarstyrk til Ólympíusamhjálparinnar til þess að standa straum af æfingabúðum og jafnvel mótum til þess að stykja Rúnar og hina íþróttamennina til að ná settu marki. Hingað til hafa styrkir Ólympíusamhjálparinnar dregist frá styrkjum Afrekssjóðs en nú er gert ráð fyrir að svo verði ekki heldur komi styrkurinn til viðbótar, þetta hefur þó ekki verið formlega samþykkt af ÍSÍ ennþá en forseti ÍSÍ, Ólafur Rafnsson, taldi mjög líklegt að svo yrði.

Fimmtudaginn 8. júní nk. heldur tækninefnd kvenna í áhaldafimleikum fund um þróun og endurnýjun á Íslenska fimleikastiganum sem fyrirhugað er að hefja keppni í í febrúar 2007. Fundurinn verður haldin í sal ÍSÍ á 3. hæð kl. 20:00. Síðustu tvo áratugi, með 4-5 ára millibili, hefur Íslenski fimleikastiginn tekið minni og stærri breytingum út frá þróun áhaldafimleika á alþjóðlegum vettvangi og slíkt er einnig fyrirhugað nú m.a.með tilliti til nýrra dómarareglna FIG sem og stöðu íslenskra áhaldafimleika. Að mörgu þarf að huga s.s.: Hvar á skalli upphafseinkunna á liggja 10.00, 12.00 eða 14.00 ? Hve mörg keppnisþrep ? Hvaða fimleikaæfingar eru æskilegar í hverju keppnisþrepi ? Hvort og hve mörg þrep á tvíslá skulu vera á ein- eða tvírá ? Svo að eitthvað sé nefnt ! Tækninefnd FSÍ hvetur þjálfara og áhugafólk um þróun í áhaldafimleikum kvenna hérlendis til að mæta og taka þátt í umræðum um gerð Íslenska fimleikastigans á komandi tímabili. Þeir sem ekki komast á fundinn en vilja koma ákveðnum atriðum á framfæri er velkomið að senda tölvupóst til Hlín Bjarnadóttur (hlinbjarna@hotmail.com)

Í mars var kjörin ný stjórn hjá Fimleikafélagi Akureyrar, þó nokkur endurnýjun varð á stjórninni. Tveir karlmenn eru nú í stjórn Félagsins. Stjórnun skipa þau; Valgerður Anna Vilhelmsdóttir, formaður (í leyti), Þórhildur Þórhallsdóttir, formaður / ritari, Friðbjörn B. Möller, Svanhildur Bragadóttir, Katrín Melstað Jónsdóttir, Andri Teitsson og Berglind Tulinius. Haldin voru tvö mót á vorönn annarsvegar Akureyrarfjör og komu þá lið frá Reykjavík til að keppa. Svo var haldið Akureyrarmót og var mikið um dýrðir í kringum það. Nýtt Íþróttahúsnæði er í burðarliðnum fyrir félagið sem verður um 2700 m2 en mun fimleikafélagið hafa yfir að ráða ca. 1350 m2 með sal, búnings og félagsaðstöðu. Vorsýning var haldin með glæsibrag 20. maí sl. og mættu þar tæplega 800 gestir til að fylgjast með krökkunum. Ný heimsíða var tekin formlega í notkun á sýningunni, slóðin er www.fimak.is