ÁHEITA-HANDGANGA niður laugaveginn!

HM-landslið karla í morgunþætti Stöðvar 2 í fyrramálið!
Nokkrir strákar í HM-landslið karla ásamt Axel Bragasyni, öðrum af tveimur landsliðsþjálfurum, verða í morgunþættinum Ísland í bítið á Stöð 2 í fyrramálið. Þar munu þeir kynna ÁHEITA-HANDGÖNGU niður laugaveginn sem fram fer þann 5. júlí nk. Auk þess munu þeir kynna verkefnið sem framundan er þ.e. HM í fimleikum sem haldið verður í Kaliforníu í Bandaríkjunum í ágúst. Viðtalið við strákana er áætlað að hefjist kl. 7:20.
Fjáröflun fyrir HM í fimleikum er í fullum gangi og hefur gengið mjög vel. Eins og áður hefur verið greint frá hér á fimleikar.is er Ísland í fyrsta skipti með í liðakeppninni á HM. Þeir sem vilja styðja við bakið á strákunum og heita á þá í handgöngunni geta hringt í Guðjón Guðmundsson, sem á sæti í Tækninefnd karla, s/899-2694 eða sent honum tölvupóst hér.

Hún á afmæli í dag ! Eitt ár síðan heimasíðan var opnuð

Heimasíðan www.fimleikar.is á afmæli í dag! 17. júní í fyrra var síðan fyrst opnuð í mjög frumlegri mynd. Jafnvel þó að nú sé langt í land með að síðan fullnægji þörfum fimleikaáhugafólks hefur mikið breyst á einu ári. Þökkum fyrir þann áhuga sem síðan hefur fengið og fyrirhöfn allra að senda fréttir og tilkynningar á fimleikar@fimleikar.is

Kristín Gígja Gísladóttir keppir á HM

Besta fimleikafólk íslands mun keppa á Heimsmeistaramóti í áhaldafimleikum sem fram fer í Anaheim í Kaliforníu 16. - 24. ágúst n.k. Tilkynnt var um landsliðið nú í byrjun júní. Í landsliði kvenna er m.a. Kristín Gígja Gísladóttir en hún hefur búið undanfarin ár í Kaliforníu ásamt fjölskyldu sinni og hefur því ekki keppt á mótum á vegum FSÍ. Fyrir lesendur www.fimleikar.is er því sjálfsagt gaman að fá að vita aðeins meira um þennan glæsilega fulltrúa íslands á HM nú í sumar.

Kristín Gígja er 15 ára gömul og býr í San Jose í Kaliforníu ásamt foreldrum sínum, Margréti Kristjánsdóttur og Gísla Hermannssyni, og systur sinni Guðmundu Hrund Gísladóttur (25 ára). Margrét móðir Kristínar er íþróttakennari og þjálfaði á sínum tíma fimleika í Gerplu en er nú þjálfari í fimleikaskólanum sem Kristín Gígja æfir í en hann heitir Almaden Valley Gymnastics Club og hefur skólinn verið starfræktur í 30 ár. Meira

Gymnastrada í Lissabon - laus sæti - skella sér með !

Eins og flestir vita verður Gymnastrada haldin í Lissabon dagana 18 - 28 júlí næstkomandi. Nú er að fara frá Íslandi stærsti hópur sem tekið hefur þátt í Gymnaeströdu til þessa eða í allt 165 manns. Flogið verður í beinu flugi til Lissabon föstudaginn 18. júlí og komið til baka snemma á mánudagsmorgun 28. júlí. Það eru laus sæti í flugvélinni sem ætlunin er að selja á góðu verði.
Gymnaestrada er stærsta sýning fimleika sem haldin er í heiminum og taka þátt um 26 þúsund fimleikamenn á öllum aldri. Fjölbreyttar sýningar eru allann daginn í mörgum sýningahöllum. Á kvöldin eru haldnar sér sýningar frá Brasilíu, Japan, Þýskalandi, Sviss og fleiri löndum. Glæsilegasta sýningin er Fig Gala, en í henni koma fram valdir hópar alls staðar að úr heiminum, þar á meðal flokkur frá Stjörnunni í Garðabæ. Norræna kvöldið er fjölbreytt sýning með þátttöku allra Norðurlandanna. Þá standa ýmis námskeið og fyrirlestrar til boða.
Við viljum hvetja þá sem hefðu áhuga á að fara með í þessa ferð að hafa samband, blanda saman góðri skemmtun, frábærum sýningum , ásamt góða veðrinu , það er margt að skoða í Lissabon og sýningasvæðið " EXPO" er frábært og vel staðsett.
Hafið samband við Önnu Möller á skrifstofu FSÍ 514-4060 eða netfang: fsi@isisport.is eða Birnu í síma 891-7545. Fimleikasambandið getur haft milligöngu um hótel ef óskað er.

Námskeið fyrir fimleikaþjálfara, "choreography"

Dagana 14. - 16. ágúst nk. verður haldið námskeið fyrir fimleikaþjálfara í samningu og uppbyggingu dansa, "choreographiu". Einnig verður farið í aðra þætti eins og rétta líkamsstöðu, grunnatriði í dansi, pirouetta, hopp, teygjur og upphitunartækni.
Kennari á námskeiðinu verður Steinunn Ketilsdóttir sem stundar dansnám við Hunter College í NY.
Námskeiðið verður haldið í Íþróttamiðstöðinni Björk í Hafnarfirði.
Fimmtudag 14. ágúst - kl: 18:00 - 21:00
Föstudag 15. ágúst - kl: 18:00 - 21:00
Laugardag 16. ágúst - kl: 13:00 - 16:00
Verð: kr. 9000- (greiðist á fyrsta degi námskeiðs). Innifalið í verði eru námskeiðsgögn og heitur pottur og gufa. Nánari upplýsingar og skráning hjá Steinunni: sími: 565 - 6441 / 849-0977.
e-mail: steinunn_k@hotmail.com

Æfingar fyrir Gymnaeströdu

10. júní í Fylkishöll kl. 19.30 - 21.30
11. júní í Fylkishöll kl. 19.30 - 21.30
18. júní í Íþrótthúsi Gróttu kl. 19.30 - 21.30
2. júlí í Íþróttahúsinu Austurbergi kl. 19.30 - 21.30
9. júlí í Laugardalshöll 19.30 - 22.00
10. júlí Lokaæfing (sýning) í Laugardalshöll
Farið verður út föstudaginn 18. júlí kl. 21.55 og komið til baka á mánudagsmorgun 28. júlí kl. 07.05. Til greina kemur að flýta brottförinni 18. júlí og þá um leið heimkomunni 27/28. Það mun skýrast fljótlega.

Leikir í bland við fimleikakennslu

Oft er gaman að blanda saman fimleikakennslu og leikjum. Inn á heimasíðunni http://www.leikjabankinn.is má finna mikið af leikjum. Góða skemmtun.

Myndir af Vorsýningu Gerplu

Kristjana Sæunn Ólafsdóttir í lausu lofti

Okkar keppendur á HM í áhaldafimleikum

Nú í kvöld var kynnt val á landsliði Íslands sem keppa mun á heimsmeistaramótinu í áhaldafimleikum sem fram fer í Anaheim í Kaliforníu 16. - 24. ágúst n.k. Að þessu sinni verður sent bæði karla- og kvennalið til keppni ásamt þjálfurum og dómurum alls 18 manns. Farið verður 9. ágúst og komið heim þann 25. ágúst.
Keppendur verða í kvennaliði Inga Rós Gunnarsdóttir, Gerplu, Kristín Gígja Gísladóttir, æfir í USA, Sif Pálsdóttir, Gróttu og Tanja Björk Jónsdóttir, Björk.
Keppendur verða í karlaliði Anton Heiðar Þórólfsson, Ármanni, Dýri Kristjánsson, Gerplu, Grétar K. Sigþórsson, Ármanni, Jónas Valgeirsson, Ármanni, Rúnar Alexandersson, Gerplu, Gunnar Sigurðsson, Ármanni. Meira

Vorsýning Gerplu

Vorsýning Gerplu fór fram í troðfullri Laugardalshöll nú í dag. Allir iðkendur félagsins komu fram á sýningunni sem var hin glæsilegasta og mátti greinilega sjá að áhorfendur sem fylltu öll sæti hallarinnar kunnu vel að meta það sem fyrir augu bar. Eins og sjá má af meðfylgjandi myndum komu fram á sýningunni iðkendur sem voru að taka þátt í sinni fyrstu sýningu og allt upp í þrautþjálfað keppnisfólk. Fleiri myndir munu verða settar á netið á næstu dögum. Myndir hér.

Vorsýning Gróttu

Meðfylgjandi eru myndir sem voru teknar á vorsýningu fimleikadeildar Gróttu sem haldin var fimmtudaginn 22. mars s.l. Í lok sýningarinnar fór fram kjör íþróttamanns Gróttu fyrir árið 2002. Tilnefningarnar komu frá deildum félagsins og er gaman að segja frá því að það var fimleikakonan Sif Pálsdóttir hlaut titilinn og óskum við henni hjartanlega til hamingju með þennan árangur. Einnig voru veittar viðurkenningar fyrir íþróttafólk sem hefur keppt með landsliðum sinnar íþróttar. Í lokin bauð aðalstjórn félagsins öllum upp á veitingar. Myndir hér.