Nú um helgina fór fram Gymnova Þrepamót FSÍ en það er eitt fjölmennasta fimleikamót ársins en að þessu sinni voru þátttekendur um 230 talsins á aldrinum 8 til 16 ára og var þeim skipt upp í 19 keppnishópa. Mótið gekk vel fyrir sig og er greinilegt að mikill fjöldi ungra og efnilegra iðkenda stunda nú fimleika um allt land og mátti sjá á tilburðum þeirra á mótinu að framtíðin er björt í fimleikum á íslandi. Fimleikadeild Gróttu annaðist framkvæmd mótsins og voru Þóra Sigurðardóttir og Margrét Pétursdóttir mótsstjórar auk þess sem Berglind Pétursdóttir og fjöldi annarra sjálfboðaliða kom að framkvæmd þessa umfangsmikla móts. Hver keppandi hjá stúlkum keppnir á 4 áhöldum og 6 hjá strákum og því má gera ráð fyrir að keppni hafi farið fram í yfir eitt þúsund æfingum um helgina (m.v. 30% strákar og 70% stúlkur).

Harpa Guðrún Hreinsdóttir úr Stjörnunni hlaut 34,3 stig í 5. þrepi og hafnaði í 3. sæti en á myndinni hér að ofan er hún með bróður sínum Stefáni Hauki en hún er greinilega mjög stolt af bróður sínum sem fær að taka þátt í að fagna með systur sinni. Harpa er í Hofstaðaskóla í Garðabæ og æfir fimleika 4 sinnum í viku hjá Hrafnhildi Gunnarsdóttur en hún var valin fimleikakona ársins 2002. Vinkona Hörpu Guðrúnar, hún Eydís Lilja Eysteinsdóttir er viss um að Harpa komist í landsliðið í fimleikum því hún sé rosalega dugleg að æfa sig. Dugnaður Hörpu á æfingum hefur greinilega skilað henni góðum árangri nú og verður spennandi að sjá hvort að hún muni komast í landsliðið í framtíðinni.

Úrslit mótsins hér í exelskjölum. Hér má sjá eitt skjal með öllum útslitunum.

5. þrep st. 9 ára
5. þrep st. 10 ára
5. þrep st. 11 ára
5. þrep st. 12 ára og eldri

3. þrep st. pilta eldri
3. þrep st. pilta yngri

1. þrep pilta

Sjá einnig um mótið á www.armenningar.is/fimleikar

Strákarnir úr Ármann bíða eftir að fá að gera gólfæfingar.

Íþróttamaður æskunnar í Vestmannaeyjum var fimleikakonan Tanja Björg Sigurjónsdóttir en hún er á 17. ári. Þetta er í annað skiptið sem slíkt val fer fram en íþróttamaður æskunnar er valin úr hópi þeirra barna og unglinga 18. ára og yngri sem þykja hafa náð frábærum árangri.

Tanja Björg hefur stundað fimleika frá 6 ára aldri af miklum dugnaði og áhuga en einnig hefur hún sýnt fram á mikla hæfileika í öðrum íþróttagreinum og m.a. verið kölluð á landsliðsæfingar í fótbolta U16. Hún er sú fyrirmynd sem við leytum eftir í hópi unglinga sem stunda íþróttir, reglusöm og sinnir einnig námi af sama dugnaði og allt annað sem hún tekur sér fyrir.

Við á fimleikar.is óskum Tönju Björg til hamingjum með tilnefninguna.

Rúnar Alexandersson og Elísabet Sif Haraldsdóttir voru valin íþróttamaður og kona Kópavogs 2004

Þorgeir Ívarsson

Stjórn ÍSÍ hefur samþykkt úthlutun úr Afrekssjóði ÍSÍ og Sjóði ungra og efnilegra íþróttamanna fyrir samtals 47 milljónir en þar af nema styrkir til iðkenda fimleika nú 3.070 þúsund. Er þetta annað árið í röð sem styrktir til fimleikafólks lækka. Árið 2003 námu styrkir til iðkenda fimleika samtals 3.455 þúsund en árið 2004 námu styrkirnir 3.080 þúsund. Heildarstyrkir úr afrekssjóði dragast nú saman úr 71 milljón í 47 milljónir sem er öfug þróun við það sem gerðist á milli áranna 2003 til 2004 en þá hækkuður þeir úr 62 milljónum í 71 milljón eins og að framan greinir. Þrátt fyrir lækkun þá hækkar þó hlutfall til fimleikafólks úr 4,3% af öllum styrkjum í 6,5% sem er þó jákvæð þróun enda er óhætt að segja að síðasta ár hafi fimleikafólk staðið sig sérstaklega vel og á ýmsa mælikvarða betur en á árunum þar á undan.
Þeir sem hlutu styrki að þessu sinni eru: Rúnar Alexandersson 1.920þ, Viktor Kristmannsson 300þ, Harpa Snædís Hauksdóttir 200þ., Sif Pálsdóttir 200þ., Hera Jóhannesdóttir 100þ., Kristjana Sæunn Ólafsdóttir 200þ., Róbert Kristmannsson 100þ. og Bjarki Ásgeirsson 50þ.
Sjá nánar úthlutun hér og umfjöllun ÍSÍ hér. Umfjöllun um úthlutun síðasta árs hér.

Þrepamót Fimleikasambandsins verður haldið 29. og 30. janúar n.k. Fimleikadeild Gróttu sér um mótið sem verður haldið í Laugardalshöll. Mótið hefst kl. 10.00 á laugardaginn 29. janúar og áætlað er að því ljúki kl. 18.00. Á sunnudeginum hefst mótið kl. 9.30 og áætlað er að því ljúki kl. 16.00. Á laugardeginum keppa stúlkurnar í 1., 2., 3., og 4. þrepi en dregngir í öllum þrepum þ.e. 1., 2., 3., og 4. þrepi en á sunnudeginum keppa stúlkur í 5. þrepi íslenska fimleikastigans.

Helgina 15. – 16. jánúar sl. hélt fræðslunefnd FSÍ tvö þjálfaranámskeið í Reykjavík, sérgreinahluta 1B og 2A. Námskeiðin eru hluti af þjálfaramenntunarkerfi ÍSÍ og sérsambandanna. Þátttaka var mjög góð um 40 manns tóku þátt að þessu sinni.
Fræðslunefnd FSÍ hefur því haldið sjö þjálfaranámskeið frá hausti 2004, í Reykjavík og á Akureyri, sem telst mjög gott innan íþróttahreyfingarinnar og þátttaka ávallt mjög góð. Oft hafa myndast biðlistar á námskeiðin en fræðslunefnd hefur kappkostað að koma öllum á námskeiðin.
Vill fræðslunefnd þakkar þátttakendum, kennurum og aðildarfélögum fyrir skemmtilegt samstarf. Nú er unnið að fá fyrirlesara á námskeið 2B sem er toppþjálfaranámskeið í áhaldafimleikum. Stefnt er að því að námskeiðið verði haldið á haustdögum 2005.
Fræðslunefnd FSÍ

Rúnar Alexandersson og Guðmundur Þór Brynjólfsson munu fjalla um þátttöku Rúnars á Ólympíuleikunum í Aþenu á síðasta ári. Þar mun Rúnar sýna ýmsar myndir og farið verður yfir aðdragandan að keppni hans á Ólympíuleikunum. Allir eru velkomnir til þess að mæta og fylgjast með frásögn frá þessum stærsta íþróttaviðburði sem haldinn hefur verið og sjá með eigin augum hvað gerðist bak við tjöldin á Ólympíuleikunum og spyrja Rúnar og Guðmund út í þessa upplifun sem þátttaka á Ólympíuleikum er. Iðkendur, foreldrar og aðrir sem áhuga hafa á fimleikum eru því velkomnir.
Fundurinn byrjar kl. 19:30 á föstudaginn 21. janúar og stendur til um 20:15 og fer hann fram í íþróttahúsi Gerplu að Skemmuvegi 6, Kópavogi. Aðgangur ókeypis.

Auður Inga Þorsteinsdóttir hefur verið valin í tækninefndina í hópfimleikum í Noregi. Er þetta mikill heiður fyrir hana og einnig gaman fyrir okkur hér heima á Íslandi að fylgjast með okkar fólki erlendis. Auður Inga hefur verið virk í starfi sínum tengdum fimleikum á undanförnum árum og ekki síst sem dómari í hópfimleikum en einnig sem þjálfari. Við óskum henni til hamingju með ný verkefni í Noregi.

Íslandsmót í hópfimleikum verður haldið í Laugardalshöll, föstudaginn 18. og laugardaginn 19. mars n.k. sömu helgi og Íslandsmót í áhaldafimleikum eins og verið hefur undanfarin ár.
Lið verður að hafa náð 21 stigi á FSÍ mótum keppnistímabilsins eða á Stjörnutrompi til að tryggja sér þátttökurétt í undanúrslitum á Íslandsmótinu í hópfimleikum 2005. Þau þrjú lið sem hafa hæstu samanlögðu stigin í undanúrslitum komast í úrslit daginn eftir og taka þau með sér stigin frá undanúrslitunum.
Með fyrsta liði hvers félags þarf að senda 2 dómara. Einn dómari bætist við á hvert lið eftir það. Þessar reglur taka þegar gildi. Þannig að ef félag sendir 2 lið á mót þarf að senda 3 dómara, ef félag sendir 3 lið þá þarf að senda 4 dómara o.s.frv..
Nú fer að styttast í mót vetrarins og minnir THF þjálfara á að virða nýjar reglur sem nefndin sendi út fyrir áramótin um skil á stökklistum og einnig á nauðsyn þess að þátttökutilkynningum sé skilað inn, ásamt nöfnum dómara tveimur vikum fyrir mót.
Frá Tækninefnd í hópfimleikum

Um síðustu helgi tóku iðkendur og þjálfarar sig til í Gerplu héltu skemmtilegan tiltektar dag með pitzzupartý í lokinn. Veggir voru málaðir, dýnur þrifnar, gryfjan tæmd, speglar fægðir og markt, markt fleira. Allir höfðu mjög gaman af enda má segja að margir af iðkendunum dvelja lengur inn í salnum heldur en vakandi inn í herbergjunum heima hjá sér.

Um síðustu helgi fór fram árlegur formannafundur FSÍ. Á fundinn mættu fulltrúar aðildarfélaga og farið var yfir ýmis mál sem snertir félögin og FSÍ. Þá komu fulltrúar tækninefnda karla, kvenna og hópfimleika og svöruðu spurningum. Gerð var grein fyrir félagakerfinu Felix, fjallað var um fjölmiðlamál innan sambandsins, kynning frá fræðslunefnd auk þess að sérstök kynning var á fyrirmyndarfélagi ÍSÍ. Fundurinn var fjölmennur og nokkrar umræður voru um ýmis mál.
Á fundinum var samþykkt að stofna sérstakan fjölmiðlahóp kynningarhóp sem á að efla kynningu á keppnum á vegum FSÍ og á fimleikum almennt. Í hópnum er Jón Finnbogason, varaformaður Gerplu, Ásgeir Daníelsson í stjórn fimleikadeildar Ármanns, Guðrún Vilhjálmsdóttir í stjórn fimleikadeildar Gróttu, Oddur V. Þórarinsson, formaður fimleikadeildar Fjölnis.

Bergþóra Kristín Ingvarsdóttir, 15 ára, er fimleikamaður Fimleikadeildar Umf.Selfoss árið 2004. Bergþóra Kristín er metnaðarfull fimleikakona, sem stendur sig vel, hún er einn af máttarstólpunum í meistarahópi fimleikadeildarinnar og er góð fyrirmynd annarra í greininni á Selfossi. Hún var einnig tilnefnd til Íþróttamanns Árborgar 2004 og hafnaði þar í 3. sæti af 13 þátttakendum sem er glæsilegur árangur. Aðeins örfáum stigum munaði á þremur efstu sætunum að þessu sinni. Það er því greinilegt að tekið er eftir fimleikafólki á Selfossi og þeirra árangur og starf metið.

Fimleikadeild Stjörnunnar óskar eftir þjálfurum. Vegna mikillar fjölgunar iðkenda og forfalla þjálfara óskar fimleikadeild Stjörnunnar eftir þjálfurum til starfa nú þegar. Áhugasamir vinsamlega hafið samband við Elsu Halldórsdóttur í síma 862-3932.

Piltakeppni: Sunnudaginn 23. janúar Mæting kl 12:00 mót hefst kl 13:00 verður haldið Garpamót Gerplu og GK í húsnæði Gerplu við Skemmuveg 6.Nánara tímaplan síðar. Þátttakendur eru piltar fæddir 1997 og fyrr og verður einungis keppt í 4. þrepi íslenska fimleikastigans. Einungis piltar sem ekki hafa keppt á mótum FSÍ er heimil þátttaka.
Stúlknakeppni: Laugardaginn 22. janúar verður haldið Garpamót Gerplu og GK í húsnæði Gerplu við Skemmuveg 6. Mæting kl 14:00 mót hefst kl 15:00.Nánara tímaplan sent síðar. Þátttakendur eru stúlkur fæddir 1998 og fyrr og verður einungis keppt í 6. þrepi íslenska fimleikastigans.
Þátttökugjald er kr 1000 og þurfa öll lið sem senda keppendur einnig að senda dómara með liðinu. Verðlaun eru í boði Fim ehf sem selur GK vörur á Íslandi
Vinsamlegast tilkynnið fjölda þátttakenda, nöfn þeirra og nafn dómara fyrir 7. janúar á netfangið if.gerpla@simnet.is. Tímasetningar auglýstar þegar fjöldi þátttakenda er kunnur.

Tækninefnd í hópfimleikum hefur ákveðið að Íslandsmót í hópfimleikum fari fram föstudaginn 18. og laugardaginn 19. mars í Laugardalshöll í tengslum við Íslandsmót í áhaldafimleikum eins og gert hefur verið síðustu tvö ár.
Norðurlandamót í áhaldafimleikum og Norðurlandamót í hópfimleikum eru haldin sömu helgina eða 9. – 10. apríl annað í Finnlandi og hitt á Íslandi. Af þessum sökum er besta helgin fyrir bæði Íslandsmótin helgina 18 – 20. mars.

Fimleikaáhugafólki er þakkað samstarfið á liðnu ári sem var bæði ánægjulegt og viðburðarríkt. Vonandi verður árið 2005 ykkur öllum farsælt. Þakka fyrir allar upplýsingarnar sem sendar hafa verið á fimleikar@fimleikar.is til birtingar á síðunni. Árið 2005 verður fjórða almanaksárið sem upplýsingum um fimleika er safnað saman á www.fimleikar.is Með ykkar hjálp verða árin fleiri sem síðunni veður haldið úti og innihald síðunnar áhugaverðara fyrir ykkur öll. Takk fyrir samstarfið á liðnum árum.

Jón Finnbogason