Fjölmennt hópfimleikamót fór fram í íþróttahúsi Stjörnunnar nú í kvöld. Mótið var skemmtilegt í alla staði og ljóst að framundan eru skemmtileg fimleikamót þar sem þessir krakkar munu reyna að bæta þann góða árangur sem þau náðu á þessu fyrsta móti.
Í eldri flokki sigraði lið frá Björk en það sýndi glæsilegan dans og fékk fyrir vikið langbestu einkunn mótsins eða 8,66.
Hér má sjá úrslit mótsins. Myndir af mótinu.

Fyrsta hópfimleikamót vetrarins mun fara fram í íþróttahúsi Stjörnunnar þann 31. janúar kl. 19:00. Þetta eru óstaðfestar fréttir en ég vonast til þess að félög sem eru að halda mót, hvort sem það eru innanfélagsmót, boðsmót eða mót á vegum FSÍ, sjá hag sínum best borgið með að senda tilkynningu um mótið á fimleikar@fimleikar.is Það er alveg ljóst til þess að fá áhorfendur á fimleikamót þá þarf að láta vita af því að slíkt mót sé að fara fram. Það fréttist ekki að sjálfum sér!!! Mótshaldarar: SENDIÐ TÍMANLEGA TILKYNNINGU UM FYRIRKOMULAG, TÍMASETNINGAR OG ANNAÐ SEM SKIPTIR MÁLI Á fimleikar@fimleikar.is Þannig frétta allir sem hafa áhuga á fimleikum af mótinu, annars ekki!!!

Um helgina sem leið fór fram Íslandsmót í almennum fimleikum. Mótið fór fram í Keflavík. Hér má nálgast úrslit á mótinu. Skjal A og B. Fjölmargir meistara fengu verðlaun en einnig var gaman að sjá hversu margir efnilegir krakkar tóku þátt á mótinu en þeir voru um 200. Það er ljóst að mikið af upprennandi fimleikastjörnum sem leynast í þessum fjölda. Mótið fór vel fram en þó var smá töf í dómgæslu á stökki og ung stúlka slasaðist þegar hún var að gera yfirslag á stökki og óskum við henni góðs bata. Að sögn mótshaldara sem var Fimleikadeildin í Keflavík var að öðru leyti ánægja með mótið.

Helgina 1. – 2. febrúar nk. fer fram Gymnova þrepamót FSÍ í áhaldafimleikum pilta og stúlkna í Laugardalshöll. Tækninefndir í áhaldafimleikum hafa lokið tæknivinnu fyrir mótið og eru 244 þátttakendur skráðir til keppni eða 70 piltar og 174 stúlkur frá tíu fimleikafélögum og -deildum. Meira

Þann 17. - 19. janúar sl. hélt tækninefnd FSÍ í hópfimleikum dómaranámskeið í húsakynnum UMFÍ. Sjö konur tóku þátt á námskeiðinu sem fór í alla staði mjög vel fram en kennarar á námskeiðinu voru þær Guðrún Erla Þorvarðardóttir og Björt Baldvinsdóttir sem eru báðar alþjóðlegir dómarar í hópfimleikum og Sigríður Ósk sem er landsdómari.
Athygli vakti að allir þátttakendur voru að þessu sinni frá fimleikafélögum og -deildum af landsbyggðinni þ.e. frá Akureyri, Hveragerði og Selfossi.
Við óskum nýjum, ungum og efnilegum dómurum í hópfimleikum til hamingju með áfangann og umleið fimleikahreyfingunni allri því án dómara væru engin fimleikamót!

Um helgina sem leið keppti Dýri Kristjánsson, Gerplu, á móti í Illinois og stóð hann sig ágætlega á mótinu. Keppti hann á fjórum áhöldum og að hans sögn er hann sáttur við frammistöðu sína á mótinu. Hann keppti á gólfi (einkunn 8,35), bogahest (einkunn 8,25), tvíslá (einkunn 7,95) og svifrá (einkunn 7,25) en honum gekk ekki nægjanlega vel á svifránni. Þrátt fyrir að Dýri sé ekki á toppi æfingatímabilsins nú þá er hann stöðugt að bæta sig á milli móta og stefnir á að hækka einkunn sína á gólfi, boga og tvíslá um 0,2 - 0,6 en hann telur sig eiga að ná allt að 8,6 fyrir æfingar á svifrá. Nú um næstu helgi mun hann keppa á móti í Iowa og verður þá gaman að sjá hvort að Dýra takist að ná markmiðum sínum strax um næstu hlegi en hann telur að mjög mikilvægt sé að keppendur í fimleikum setji sér skýr markmið til að keppa að.
Frekari umfjöllun um mótið má sjá hér og viðtal við Dýra hér.

Í dag fór fram úthlutun íþróttastyrkja frá Kópavogsbæ. Rúnar Alexandersson, Viktor Kristmannsson og Rósa Ágústsdóttir fengu A-styrk sem eru kr. 165.000,- Dýri Kristjánsson og Inga Rós Gunnarsdóttir fengu B-stryk sem er kr. 85.000,- Samtals nema styrkirnir því kr. 665.000,- Veittir voru 27 styrkir samtals í A, B og C flokkum og skiptust þeir þannig að í A flokki voru veittir 7 styrkir og í B og C flokki voru veittir 10 styrkir í hvorum flokki. Það er mjög ánægjulegt að sjá að fimleikar fái 3 af 7 styrkjum í A flokki.

Afrekssjóður hefur gert grein fyrir úthlutun fyrir árið 2003 og fékk fimleikafólk og FSÍ styrki upp á um kr. 3.300.000,- auk þess sem FSÍ fékk 5 frífarseðla á áfangastaði Flugleiða í Evrópu og Ameríku í tengslum við landsliðsverkefni. Styrkirnir skiptast á átta afburðar fimleikamenn og konur og er ánægjulegt að sjá svo breiðan hóp fimleikafólks fá jafn myndarlega styrki eins og raun ber vitni. Meira

Ég fór í stutta heimsókn í Fylki og tók myndir af miklum fjölda af duglegum krökkum já og líka af stjórn fimleikadeildarinnar á stuttum morgunfundi á laugardegi!!

Nú um helgina var haldið þjálfaranámskeið FSÍ hluti 1A á Egilstöðum. Mikil gróska er á öllu landinu í Fimleikum ekki síst á Austfjörðum þar sem öflugt starf hefur verið á undanförnum árum og okkur því sérstakt glðiefni að nú gefist kostur á að fara með námskeið þangað. Meira

Glæsileg sýning var hápunkturinn í afmælishátíð Stjörnunnar í Garðabæ. Bæjarstjóri Garðabæjar, Ásdís Halla Bragadóttir, afhenti félaginu stökkhest að gjöf í tilefni af þessum merka áfanga og gat þess m.a. hve mikinn svip fimleikadeildin hefur sett á bæjarlífið undanfarin 20 ár.

Ég fór í heimsókn í Gerplu og tók nokkrar myndir.

Ég fór í heimsókn í Gerplu og tók nokkrar myndir.

Ég "skrapp" í heimsókn í Gróttu og tók nokkrar myndir.

Munum nú öll eftir hátíðarsýningu Stjörnunnar sem fram fer í Ásgarði, íþróttahúsi Stjörnunnar, þann 11. janúar (næsta laugardag) í tilefni af 20 ára starfsafmæli deildarinnar.
13:30 til 15:00 = Sögusýning og kynning í félagsheimili Stjörnunnar á sögu félagsins þar sem m.a. verða sýndar myndir og ýmislegt annað í sögu félagsins.
15:00 til 16:30 = Hátíðarsýning í íþróttahúsi Stjörnunnar Ásgarði. Á sýningunni koma fram fjöldi iðkenda sem bæði æfa nú hjá félaginu og gerðu það þegar fimleikadeildin var stofnuð fyrir tuttugu árum. Það er því von á skemmtilegri sýningu sem engin ætti að láta fram hjá sér fara.

Komið var við í Björk og teknar nokkrar myndir.

Íþrótta- og Ólympíusamband Íslands, í samvinnu við Biskupsstofu, býður til opins málþings um Íþróttir og gildismat. Málþingið fer fram miðvikudaginn 8. janúar kl. 17:00 á Grand Hótel Reykjavík. Fyrir íþróttafólk, þjálfara, íþróttakennara, foreldra og aðra sem áhuga hafa. Dagskrá.

Í vali íþróttafréttamanna á íþróttamanni ársins varð Rúnar Alexandersson í 7. - 8. sæti en alls hlutu 22 íþróttamenn og konur atkvæði hjá þeim 21 íþróttafréttamanni sem hefur atkvæðisrétt í valinu.
Stjórn Fimleikasambands Íslands tilnefndi Rúnar Alexandersson sem fimleikamann ársins 2002 og Sif Pálsdóttir sem fimleikakonu ársins 2002.
Þau tvö ásamt Dýra Kristjánssyni og Viktori Kristmannssyni voru valin af ÍSÍ til þess að taka þátt í æfingabúðum um næstu helgi á Laugarvatni sem ætlað er að vera fyrsta skrefið í undirbúningi ÍSÍ vegna Ólympíuleikana 2004.