Það ætti ekki að fara framhjá neinum að síðan hefur tekið á sig nýja mynd. Tæknileg atriði eru nokkur sem huga þarf að, og getur það verið að eitthvað birtist ekki allveg rétt, svona rétt á meðan verið er að uppfæra síðuna. Allar ábendingar og comment eru vel þegin og skal senda þær til vefstjóra.

Alþjóða Fimleikasambandið (FIG) sendi út fréttatilkynningu í dag þar sem gert er grein fyrir því að þann 19. febrúar sl. hlaut Mads Sejeroe Jorgensen, 23 ára danskur trampolínstökkvari, alvarlegan mænuskaða við æfingar í Toronto í Canada. Sejeroe misreiknaði sig og opnaði of snemma í æfingu og lenti á andlitinu.
Mads Sejeroe Jorgensen var í danska trampolín landsliðinu og var í Toronto með landsliðinu og þjálfara sínum við æfingar. Mads var mjög efnilegur fimleikamaður og í raun í upphafi síns ferils með keppnisfélaga sínum Peter Jensen. Þeir náðu 5. sæti á heimsmeistaramótinu 1998 í Sydney, 9. sæti á heimsmeistaramótinu 1999 í Sun City og 6. sæti á nýafstöðnu Trampoline World Cup Final í Hannover.
Horst Kunze, forseti trampolín tækninefndar FIG sagði að um væri að ræða alvarlegasta óhapp við trampolínæfingar í um 21 ár og tók fram að alvarleg slys í trampolínæfingum væru mjög sjaldgæf. Keppnisreglur í trampolínstökkum hvetja ekki til áhættutöku heldur umbuna frekar öryggissjónarmiðum. Þjálfari Mads Sejeroe er talinn með hæfustu og reynslumestu trampolínþjálfurum í heiminum í dag.
Fjölskylda Mads´s og kærasta fóru stax eftir slysið til Canada til að vera hjá honum á þessum erfiðu tímum. Hugur fimleikafólks um allan heim er með þeim og óskar Mads sem bestum bata
Unnið úr fréttatilkynningu FIG.

Keppni var rétt í þessu að ljúka í Madeira þar sem Rúnar Alexandersson keppti til úrslita á 3 áhöldum, bogahesti, hringjum og tvíslá. Honum tókst að sigra tvíslá með 9.15 og varð í 2. sæti á bogahesti með 8.625, þrátt fyrir fall en hann náði ekki verðlaunasæti í hringjum. Góður árangur hjá Rúnari og gott veganesti fyrir þau mót sem hann mun taka þátt í á næstu vikum. Viktor Kristmannsson náði sér ekki alveg á strik en fékk þó 8.55 á stökki sem er nokkuð góð einkunn.

Fimleikahátíðin Gymnastrada fer fram í 11 sinn nú í sumar í Lissabon í Portúgal. Gymnastrada er ein stærsta fimleikahátíð sem haldin er í heiminum, og er oft líkt við Olympíuleika hvað varðar umfang og glæsileika. Gymnastrada er haldin fjórða hvert ár. Fimleikahópar frá Íslandi hafa tekið þátt fimm sinnum, Sviss, Danmörk,Amsterdam, Berlín og árið 1999 í Gautaborg en þá fóru frá Islandi 116 þátttakendur. Meira

Nú um helgina keppir Rúnar Alexandersson á alþjóðlegu fimleikamóti á eyjunni Madeira og er þetta fyrsta keppnishelgin af sex hjá Rúnari, en hann mun keppa á Bikarmóti FSÍ um næstu helgi (1. - 2. mars). Þann 7. mars tekur Rúnar þátt í sterku boðsmóti í Kaupmannahöfn og síðan koma þrjú heimsbikarmót í röð, það fyrsta í París, þar á eftir í Cottbus í Þýskalandi og það síðasta í Grikklandi. Það er því ljóst að Rúnar á erfiða og spennandi tíma fyrir höndum og verður gaman að fylgjast með árangri hans.

Tveir keppendur frá Gerplu þeir Rúnar Alexandersson og Viktor Kristmannsson keppa nú um helgina (22. - 23. febr.) á fimleikamóti á eyjunni Madeira við Portúgal en með þeim eru Mata Kirmes þjálfari og Heimi J. Gunnarssyni þjálfari en hann dæmir jafnframt á mótinu. Um er að ræða mjög sterkt mót þar sem vegleg verðlaun eru í boði fyrir þrjá efstu menn á hverju áhaldi og einnig í samanlögðu auk þess sem öllum keppendum er boðið á mótið og allt uppihald er frítt. Einnig er keppt í rithmiskum fimleikum. Við vonum að piltarnir okkar standi sig vel en þetta er kærkomið tækifæri til að ná lágmörkum fyrir HM 2003. Við óskum þeim góðs gengis á mótinu.

Til stendur að stofna Fimleikadómarafélag Íslands. Er félaginu ætlað að stuðla að fjölgun dómara í landinu með dómaranámskeiðum, halda uppi fræðslustarfi meðal dómara og aðildarfélaga FSÍ og að gæta hagsmuna dómara. Félagið verður fjármagnað með árgjöldum félagsmanna og tilteknum hluta af þóknun dómara fyrir dæmd mót. Stofnfundur félagsins fer fram þann 27. febrúar kl. 20:00 í fundarsal ÍSÍ. Hér má sjá drög að lögum félagsins.

Dýri Kristjánsson Gerplu keppti fyrir Minnesota Háskóla við Michigan Háskóla á laugardaginn (15.2). Dýri keppti á þremur áhöldum. Fyrir æfingar á bogahest fékk hann 8,2 stig og gekk nokkuð vel. Á tvíslá fékk hann 8,05 en þrátt fyrir að æfingin hafi verið áfallalaus þá þarf aðeins að laga æfinguna fyrir næsta mót. Á svifrá fékk hann svo 8,05 sem einnig var áfallalaus fyrir utan fall í afstökki. Eftir tvær vikur keppir Minnesota Háskóli við Oklahoma Háskóla.
Nýlega setti tækninefnd karla lágmörk fyrir keppni á HM 2003 og er þar m.v. meðalstalseinkunn hvers einstaklings á hverju áhaldi verður þá 8,0 og samanlagður stigafjöldi hvers einstaklings 48,00 stig. Á þeim áhöldum sem Dýri keppti á um helgina er hann yfir þeim viðmiðum sem tækninefndin hefur sett.
Hér má sjá heimasíðu Dýra og nánari upplýsingar um mótið.

Bikarmót FSÍ í hópfimleikum fór fram laugardaginn 15. febrúar. Björk, Gerpla P1 og Stjarnan urðu í fyrstu þremur sætunum með nokkra yfirburði. Lið Bjarkar sigraði annað árið í röð Bikarmeistaratitilinn. Meira
Þessi frétt hefur verið leiðrétt.

Framundan er Bikar- og Íslandsmót í hópfimleikum. Bæði mótin eru ávallt mjög skemmtileg og oft á tíðum lítill munur á því liði sem vinnur og þeim sem hafna í öðru og þriðja sæti. Fyrir áhorfendur og stundum keppendur á fimleikamótum er oft erfitt að skilja hvað veldur mismunandi einkunnum keppenda. Oft er skýringa að leita í því að ekki er til staðar fullnægjandi þekking á þeim reglum sem dæmt er eftir. Sesselja Järvelä var tilbúin til þess að upplýsa okkur um nokkra helstu þætti í dómgæslu í hópfimleikum. Meira

Fimleikaáhugafólk hefur tekið eftir því að undanförnu að á Selfossi fer fram öflugt fimleikastarf. Til að fræða okkur aðeins um það starf sem þar fer fram fengum við Olgu Bjarnadóttur til að segja okkur lítillega frá fimleikadeildinni. Meira

Nú í janúar var haldið sambandsdómaranámskeið í áhaldafimleikum kvenna. Fjórtán konur á aldrinum 16 – 26 ára tóku þátt á námskeiðinu sem var nú með nokkru öðru sniði en áður þ.e. kennslugögn voru afhent um tveimur vikum áður en kennsla hófst og námskeiðið tekið á lengra tímabili en áður og kennt í styttri tíma í senn. Meira

Tækninefnd karla hefur ákveðið að stefna að því að senda karlalið til keppi á Heimsmeistaramótinu sem haldið verður í Bandaríkjunum í ágúst n.k. Nefndin hefur því sett eftirfarandi lágmörk vegna þess: Samanlagður lágmarks stigafjöldi liðs skal vera 192,0 stig, en í liðinu eru 6 keppendur, 5 keppa á hverju áhaldi en 4 telja til stiga. Meðaltalseinkunn fyrir hvert áhald verður því 32,0 stig. Meðalstalseinkunn hvers einstaklings á hverju áhaldi verður þá 8,0. Samanlagður stigafjöldi hvers einstaklingsígildis í liðakeppni er því 48,00 stig og telur nefndin því hæfilegt að setja þann stigafjölda sem lágmörk fyrir þátttöku einstaklings á HM 2003.

Þorramót FSÍ fór fram sunndaginn 9. febrúar í fimleikahúsi Bjarkar í Hafnarfirði. Þetta var fyrsta mót ársins í frjálsum æfingum í áhaldafimleikum. Anton H. Þórólfsson, Ármann, sigraði í piltaflokki með 42,35 stig og í eldri flokki stúlkna sigraði Sif Pálsdóttir, Gróttu, með 32,6 stig og í yngri flokki stúlkna sigraði Kristjana Sæunn Ólafsdóttir, Gerplu, með 29,3 stig. Á mótinu keppti flest okkar besta fimleikafólk landsins og var gaman að sjá að flestir eru nokkuð vel undir búnir að taka þátt á Íslandsmótinu og Bikarmótinu sem fer fram eftir nokkrar vikur. Það eru því nokkrar vikur í að keppendur mótsins eiga að vera í topp formi. Þrátt fyrir það voru margir keppendur að sýna stórglæsilegar æfingar.

Dýra Kristjánssyni, Gerplu, gekk ekki vel á móti í USA um síðustu helgi. Hann keppti ekki á gólfi eins og hann hafði stefnt að en mikil og hörð keppni er í liðinu sem hann keppir með fyrir Háskólan í Minnesota en Dýri dvelur þar við nám og fimleikaæfingar við mjög góðar aðstæður. Hann keppti á bogahest, tvíslá og svifrá. Eins og áður sagði gekk honum ekki vel og datt hann tvisvar við æfingar á bogahest (einkunn 6,7) og einu sinni á tvíslá (einkunn 7,5) og svifrá (einkunn 7,175). Dýri gerði ekki Kovach á svifrá eins og hann hafði stefnt að. Að sögn Dýra náði hann ekki fullri einbeitingu á mótinu en eins og fimleikafólk þekkir eru sumir dagar erfiðari en aðrir. Við vonum því bara að dagsformið verði betra næst. Hér má sjá ítarlegri frétt um mótið.

Gymnova - þrepamót FSÍ fór fram um helgina í Laugardalshöll. Hátt í þrjú hundruð keppendur tóku þátt á mótinu og er í margra augum toppurinn á keppnistímabilinu fyrir þá sem keppa í fimleikastiganum. Að mínu mati þá eru allir þátttakendur á mótinu sigurvegarar helgarinnar. Sjálfur keppti ég á þessu móti í mörg ár og undurbúningur stóð í marga mánuði fyrir hvert mót. Því get ég ekki gert annað en óskað öllum keppendum til hamingju með stórglæsilegt mót. Eins og meðfylgjandi myndir bera með sér var bæði einbeiting og gleði að sjá í andlitum keppenda sem oft á tíðum sýndu tilfinningar sínar eftir því hvernig gekk. Úrslit laugardagsins eru hér. A, B, C, og D og sunnudagsins eru hér E og F.