Á sama tíma og við á fimleikar.is óskum ykkur öllum velfarnaðar á nýju ári og þökkum fyrir þau gömlu þá birtum við í fyrsta skiptið áramótaannál yfir helsu viðburði í ársins.
• Á Íslandsmótinu í hópfimleikum sigraði Stjarnan í Garðabæ með nokkrum yfirburðum eins og á öðrum hópfimleikamótum vetrarins (mars)
• Á Íslandsmótinu í áhaldafimleikum sigruðu Viktor Kristmannsson og Kristjana Sæunn Ólafsdóttir í fjölþraut, bæði úr Gerplu. Kristjana sigraði einnig á þremur áhöldum af fjórum í úrslitum en á tvíslá sigraði Sif Pálsdóttir Gróttu. Viktor sigraði einnig á 5 áhöldum í úrslitum á áhöldum en í gólfæfingum sigraði Jónas Valgeirsson úr Ármanni. (mars)
Nánar hér.

Ávallt er gaman að fylgjast með íslensku fimleikafólki erlendis. Fyrir nokkru sögðu við frá Kristínu Gígju Gísladóttur sem keppt hefur fyrir Íslands á alþjóðlegum mótum í áhaldafimleikum. Það er því ánægjulegt að geta sagt frá tveimur systrum, þeim Huldur Sunnu og Heklu Rún Svavarsdætrum, sem stunda nútímafimleika af miklum krafti í Bretlandi en þær hafa nú þegar unnið til fjölda verðlauna og verður áhugavert að fylgjast með þeim í framtíðinni. Þær fluttust til Englands ásamt foreldrum sínum árið 1998 og búa í Canterbury í Kent.

Vegna aukinna umsvifa hjá Íþróttafélaginu Gerplu þá er óskað eftir fimleikaþjálfara og eða íþróttakennara til starfa hjá félaginu. Spennandi verkefni eru framundan ásamt því að boðið er upp á mjög góða vinnuaðstöðu þar sem félagið hefur nýlega tekið í notkun fullbúinn fimleikasal í nýju Íþróttahúsi að Versölum í Kópavogi. Lögð er áhersla á góða menntun sem tengist íþróttaiðkun eða fimleikaþjálfun. Hjá félaginu starfa í dag um 40 þjálfarar og um 800 iðkendur. Nánari upplýsingar veitir Hallveig Andrésdóttir, framkvæmdastjóri félagsins, í síma 557-4925 og í tölvupósti igerpla@simnet.is

Björn Magnús Tómasson, Guðmundur Þór Brynjólfsson og Berglind Pétursdóttir hafa nú öðlast dómararéttindi samkvæmt nýjum reglum FIG eftir að þau hafa lokið prófi samkvæmt nýju reglunum. Björn Magnús og Guðmundur fóru til Þýskalands og Berglind til Japans þar sem FIG stóð fyrir námsstefnum um nýjar keppnisreglur.
Hefur sú grundvallarbreyting verið gerð á dómarareglum í áhaldafimleikum að 10,0 er ekki lengur hæsta einkunnin. Notast er við opið kerfi þar sem lagðar eru saman grunneinkunn fyrir erfiðleika og framkvæmdareinkunn sem eftir sem áður er dregin frá hinni fullkomnu 10,0. Gefur þetta möguleika á betri samanburð á milli einstaklinga og tekið verður upp að skrá heimsmet í erfiðleika fyrir einstök áhöld og í samanlögðum æfingar. Nú getur farið svo að fimleikamenn fá einkunn sem verður yfir 10,0.
Á þessum markverðu tímamótum er rétt að óska okkar dómurum innilega til hamingju með þennan áfanga. Eru þau meðal okkar reyndustu dómarar og munu eflaust hér eftir sem hingað til miðla þekkingu sinni til annarra dómara og iðkenda hérlendis en þess má geta bæði Björn Magnús og Berglind hafa hlotið verðskuldaða athygli hjá FIG vegna framgöngu sinnar við dómgæslu á erlendum stórmótum. Starfa þau öll við fimleikakennslu, Björn Magnús hjá Ármanni, Guðmundur Þór hjá Gerplu og Berglind hjá Gróttu.

Íris Mist Magnúsdóttir og Dýri Kristjánsson sýndu nú í vikunni stórglæsileg stökk á trampolíni þegar þau gerðu tvöfallt framheljarstökk með beinum líkama og tveimur og hálfri skrúfu. Þessa æfingu hefur íslenskur fimleikamaður aldrei framkvæmt á hópfimleikamóti hérlendis en það er aldrei að vita nema það breytist á næstu mótum. Eitt er þó víst að ekki er um Íslandsmet að ræða í þessu tilviki þar sem hvorki var um FSÍ keppni að ræða né er haldin sérstök skrá um Íslandsmet í þessum efnum. Það breytist kannski líka í framtíðinni !
Hópfimleikar hafa verið í miklum vexti á undanförnum árum, keppendum fjölgar og æfingar þeirra eru stöðugt að verða erfiðari og erfiðari. Það er ljóst af þessum myndböndum að spennandi verður að fylgjast með næsta hópfimleikamóti.

Fimleikafólk er hvatt til þess að skoða áhugaverða heimasíðu sem safnað hefur saman úrslitum á fimleikamótum undanfarna áratugi ásamt ýmsum upplýsingum um fimleikamenn.
Slóðin er: http://www.gymn-forum.com

Hið árlega Jólasveinamót mun fara fram þann 30. desember n.k. og mun mótið fara fram að Versölum í Kópavogi í nýju Íþróttahúsi Gerplu. Keppendur sem hyggjast taka þátt á mótinu skulu hafa samband við Aðalstein Finnbogason (af@anza.is / 899-3732) en hann ásamt Viktori Kristmannssyni eru mótstjórar að þessu sinni. Keppni hefst stundvíslega kl. 17:00. Þegar keppni hefur verið lokið og Jólasveinn ársins krýndur verður farið í sund og keppendur slaka á eftir erfiðar keppnisæfingar.
Fyrir þá sem ekki til þekkja þá er Jólasveinamótið aðeins fyrir fimleikamenn (karla) sem náð hafa 18 ára aldri og keppt hafa til margra ára á fimleikamótum á vegum FSÍ. Að venju verður lokað fyrir alla áhorfendur þrátt fyrir síendurteknar beiðnir um að heimila slík áhorf.
Jólasveinar ... sjáumst hressir ...

Kristjana Sæunn Ólafsdóttir, úr Gerplu, hafnaði í 3. sæti í úrslitum á stökki á alþjóðlegu boðsmóti sem Dinamo Moskva stóð fyrir en það er einn þekktasti fimleikafélag í heimi. Fyrir æfingar sínar á stökki fékk hún 8,8 stig fyrir fyrra stökkið og 8,5 fyrir seinna stökkið sem gaf henni 8,65 samtals. Kristjana Sæunn keppti einnig í úrslitum í æfingum á gólf (8,225 stig), slá (7,9 stig) og tvíslá (7,0). Í fjölþraut hafnaði hún í 18. sæti með 31,325 stig í yngri flokk. Inga Rós Gunnarsdóttir keppti til úrslita á gólfæfingum og hlaut 7,650 stig og í fjölþraut hlaut hún 30,125 stig í eldri flokk. Thelma Rut Hermannsdóttir keppti einnig í úrslitum í gólfæfingum (7,050) og hafnaði hún í 27. sæti með 29,125.
66 keppendur tóku þátt í mótnu (38 yngri flokk og 28 í eldri flokk) og komu þeir frá 15 þjóðum. Meðal keppenda voru iðkendur frá Woga club í USA þar sem Carly Peterson æfir en hún sigraði á Ólympíuleikunum 2004 auk fjölda annarra keppenda sem náð hafa góðum árangri á alþjóðlegum mótum.

 

Afrekssjóður ÍSÍ Ólympíufjölskyldu og sjóður ungra og framúrskarandi efnilegra íþróttamanna hefur tilkynnt um úthlutun styrkja 2006. Heildarstyrkur FSÍ er metin á kr. 3.660.000.- en þar af 8 frífarseðlar en hver farseðill er metin á 35.000.- Á síðasta ári fékk FSÍ samtals 3.370.000.- Stykir sjóðsins til fimleikafólks hækka því á milli ára eða um 290.000,- sem er ánægjuleg þróun.
Rúnar Alexandersson fær áfram A styrk kr. 160.000 á mánuði og er það annað árið sem hann er í þeim flokk íþróttamanna sem fá mestan stuðning frá ÍSÍ.
Viktor Kristmannsson fær kr. 300.000 í styrk (28. feb, 30 maí, 30 ág. og 30. okt.).
FSÍ fær kr. 500.000.- í styrk frá Ólympíufjölskyldu til landsliðsverkefna og 4 frí farseðla.
Í heild fá einstaklingar innan FSÍ kr. 800.000.- frá sjóði ungra og efnilegra, en styrkþegarnir eru: Fríða Rún Einarsdóttir, Gerplu kr. 200.000.- Kristjana Sæunn Ólafsdóttir, Gerplu kr. 200.000.- Róbert Kristmannsson, Gerplu kr. 200.000.- Sif Pálsdóttir, Gróttu kr. 200.000.-
Greiðslunum verður skipt í 4 hluta , 31. mars, 30 júní, 30. ágúst og 30. okt en skila þarf skýrslum 20. mars, 15. ág. og 20 okt.
Úthlutun 2005 hér. Úthlutun 2004 hér.

Alls voru 15 lið frá 8 félögum skráð til þátttöku í þremur flokkum. Stúlknaflokkur 10 ára og yngri og 10,1 ára og eldri. Siðan voru tvö strákalið mætt sem var mjög skemmtilegt.
Mótið gekk vel fyrir sig og liðin sýndu glæsileg tilþrif.
Í yngri aldursflokknum sigraði lið Selfyssinga T5 með 23,3 stig, lið Ármanns var í öðru sæti með 22 stig og lið Stjörnunnar (bláir) voru í þriðja sæti með 20,7 stig. Alls voru sjö lið í þessum flokki. Í eldri flokknum sigraði einnig lið Selfyssinga T4 með samtals 24,3 stig, lið Aftureldingar P2 voru í öðru sæti með 22,45 stig og Björk J1 var í þriðja sæti með 21,6 stig.

Mótaskrá FSÍ fyrir næstkomandi keppnistímabil er sem ég segir: sjá hér.

Dómaranámskeið í hópfimleikum verður haldið í Íþróttamiðstöðinni í Laugardal, 6. – 8. janúar 2006. Athugið að námskeiðið er fyrir nýja dómara. Við viljum hvetja félögin til að senda þátttakendur á námskeiðið.
Senda þarf skráningar á námskeiðið til skrifstofu FSÍ í síðasta lagi, miðvikudaginn 4. janúar.